សេចក្តីផ្តើម

អគ្គនាយកដ្ឋានសេដ្ឋកិច្ចឌីជីថល នៃក្រសួងសេដ្ឋកិច្ចនិងហិរញ្ញវត្ថុ ("យើងខ្ញុំ" ឬ "របស់យើង") បានអភិវឌ្ឍថ្នាល Cambodia E-Invoicing System ជាប្រព័ន្ធវិក្កយបត្រអេឡិចត្រូនិក ដែលអាចអនុញ្ញាតឱ្យសហគ្រាស/ក្រុមហ៊ុន/អាជីវកម្ម ("លោកអ្នក" ឬ "របស់អ្នក") បង្កើត ផ្ញើ និងទទួលវិក្កយបត្រតាមប្រព័ន្ធអេឡិចត្រូនិក ដើម្បីបង្កើនប្រសិទ្ធភាពនៃរំហូរការងារហិរញ្ញវត្ថុ។ យើងខ្ញុំដាក់ដំណើរការគេហទំព័រនេះ (https://e-invoice.gov.kh) ដើម្បីផ្តល់ព័ត៌មាន និងសេវាកម្មរបស់យើងខ្ញុំ ដែលក្នុងនោះយើងខ្ញុំយកចិត្តទុកដាក់យ៉ាងខ្លាំងទៅលើឯកជនភាពរបស់លោកអ្នក និងប្តេជ្ញាផ្តល់បទពិសោធន៍លើគេហទំព័រនេះប្រកបដោយសុវត្ថិភាព។ យើងខ្ញុំជឿជាក់លើតម្លាភាពនៃការអនុវត្តការងាររបស់យើងខ្ញុំ ដែលជាមូលហេតុជំរុញឱ្យយើងខ្ញុំផ្តល់ជូននូវគោលការណ៍ឯកជនភាព ដើម្បីពន្យល់ពីរបៀបដែលយើងប្រមូល ប្រើប្រាស់ និងបង្ហាញទិន្នន័យរបស់លោកអ្នក។ គោលការណ៍ដែលបានធ្វើបច្ចុប្បន្នភាពនេះនឹងផ្តល់នូវការគ្រប់គ្រងលើទិន្នន័យរបស់ លោកអ្នកកាន់តែល្អប្រសើរ និងយល់ដឹងកាន់តែច្បាស់អំពីរបៀបដែលយើងខ្ញុំប្រើទិន្នន័យទាំងនោះ។

ទិន្នន័យដែលយើងប្រមូល

• ទិន្នន័យផ្ទាល់ខ្លួនរបស់លោកអ្នកដែលយើងខ្ញុំទទួលបានមានដូចជា៖ ឈ្មោះ អាសយដ្ឋានអ៊ីមែល លេខទូរសព្ទចល័ត។ល។ គោលបំណងនៃការប្រើប្រាស់ទិន្នន័យផ្ទាល់ខ្លួនរបស់លោកអ្នកគឺដើម្បីផ្តល់នូវមតិកែលម្អអំពីឧបត្តិហេតុ (រួមមាន ៖ សំណួរ កំហុស ឬ ការត្អូញត្អែរ) ដែលលោកអ្នកអាចលើកឡើងនៅពេលប្រើប្រាស់សេវាកម្មរបស់យើងខ្ញុំ និងផ្តល់ជូនលោកអ្នកនូវព័ត៌មានថ្មីៗអំពីការផ្លាស់ប្តូរចំពោះសេវាកម្មរបស់យើងខ្ញុំ (រួមមាន៖ ការកែកំហុស មុខងារថ្មីៗ និងខ្លឹមសារដែលបានកែប្រែ) និង ដើម្បីជូនជាដំណឹងដល់លោកអ្នកអំពីសេវាកម្មថ្មីៗរបស់យើងខ្ញុំ ដែលមានសមត្ថភាពប្រហាក់ប្រហែលគ្នានឹងសេវាកម្មពីមុន។
• គេហទំព័ររបស់យើងខ្ញុំអាចនឹងតភ្ជាប់ទៅគេហទំព័រខាងក្រៅដែលមិនមែនជាកម្មសិទ្ធិរបស់យើងខ្ញុំ។ សូមជ្រាបថា យើងខ្ញុំមិនមានការគ្រប់គ្រងទៅលើខ្លឹមសារ និងការអនុវត្តរបស់គេហទំព័រខាងក្រៅទាំងនោះទេ ហើយក៏មិនទទួលខុសត្រូវចំពោះគោលការណ៍ឯកជនភាពរបស់គេហទំព័រខាងក្រៅទាំងនោះផងដែរ។
• លោកអ្នកអាចធ្វើការបដិសេធចំពោះសំណើរបស់យើងខ្ញុំសម្រាប់ការប្រើប្រាស់ទិន្នន័យផ្ទាល់ខ្លួនរបស់លោកអ្នក និងក៏ពុំមានកាតព្វកិច្ចផ្លូវច្បាប់ក្នុងការផ្តល់ទិន្នន័យទាំងនោះផងដែរ។ ក្នុងករណីនេះ យើងខ្ញុំប្រហែលជាពុំអាចផ្តល់ជូនលោកអ្នកនូវសេវាកម្មមួយចំនួនដែលលោកអ្នកចង់បាននោះទេ។

មូលហេតុនៃការប្រមូលទិន្នន័យរបស់អ្នក

យើងខ្ញុំប្រើប្រាស់ទិន្នន័យផ្ទាល់ខ្លួនរបស់លោកអ្នកដោយផ្អែកលើមូលដ្ឋានច្បាប់រួមមាន៖ (i) ការប្រើប្រាស់ទិន្នន័យគឺចាំបាច់សម្រាប់ការអនុវត្តកិច្ចសន្យាដែលមានការពាក់ព័ន្ធទៅនឹងទិន្នន័យទាំងនោះ (ii) ការប្រើប្រាស់ទិន្នន័យគឺចាំបាច់សម្រាប់អនុលោមតាមកាតព្វកិច្ចផ្លូវច្បាប់ដែលអ្នកគ្រប់គ្រងទិន្នន័យត្រូវអនុវត្ត និង (iii) ការប្រើប្រាស់ទិន្នន័យគឺចាំបាច់សម្រាប់ផលប្រយោជន៍ស្របច្បាប់របស់អ្នកគ្រប់គ្រងទិន្នន័យ លុះត្រាតែផលប្រយោជន៍ទាំងនោះមិនបំពានលើផលប្រយោជន៍ ឬសិទ្ធិនៃម្ចាស់ទិន្នន័យ។ ដើម្បីឱ្យកាន់តែច្បាស់លាស់គោលបំណងចម្បងរបស់យើងខ្ញុំគឺធ្វើការជូនជាដំណឹងដល់លោកអ្នកអំពីបញ្ហាប្រឈមណាមួយ (រួមទាំង ប៉ុន្តែមិនកំណត់ចំពោះ ឧបត្តិហេតុពាក់ព័ន្ធនឹងសុវត្ថិភាពណាមួយ)។

រយៈពេលនៃការរក្សាទុកទិន្នន័យរបស់អ្នក

ការរក្សាទុកទិន្នន័យដែលបានប្រមូលមានសុពលភាពស្របតាមភាពចាំបាច់ក្នុងការផ្ដល់ជូននូវតម្រូវការសេវាកម្មដល់លោកអ្នក ឬអនុលោមតាមលក្ខន្ដិកៈនៃច្បាប់។ រាល់ទិន្នន័យដែលយើងខ្ញុំរក្សាទុកនឹងត្រូវបានការពារស្របទៅតាមលក្ខន្ដិកៈច្បាប់ ដើម្បីទប់ស្កាត់នូវហានិភ័យពីការបាត់បង់ និងការលួចយកទិន្នន័យ ក៏ដូចជាការចូលប្រើដោយពុំមានការអនុញ្ញាត ការលាតត្រដាង ការចម្លង ការប្រើប្រាស់ ឬការកែប្រែទិន្នន័យជាដើម។

ការចែករំលែកព័ត៌មានផ្ទាល់ខ្លួនរបស់អ្នក

ក្នុងករណី ដែលយើងខ្ញុំត្រូវចែករំលែកទិន្នន័យរបស់លោកអ្នកជាមួយភាគីទីបី ដែលអនុញ្ញាតដោយច្បាប់ជាធរមាន ភាគីទីបីទាំងនោះអាចជាក្រុមហ៊ុនដៃគូរ ឫក្រុមហ៊ុនផ្កត់ផ្គងសេវា។

ការចូលទៅប្រើប្រាស់ទិន្នន័យរបស់អ្នក

• លោកអ្នកអាចទាញយករាល់ព័ត៌មានពាក់ព័ន្ធនឹងទិន្នន័យផ្ទាល់ខ្លួនរបស់លោកអ្នក បូករួមទាំងសិទ្ធិក្នុងការទទួលបាននូវគ្រប់ព័ត៌មានដែលបានផ្ដល់ដែលស្ថិតក្នុងទម្រង់ទូទៅ និង Machine-Readable។
• ប្រសិនបើលោកអ្នកបានយល់ព្រមអនុញ្ញាតឱ្យយើងខ្ញុំអនុវត្តដំណើរការទិន្នន័យផ្ទាល់ខ្លួន លោកអ្នកក៏អាចសម្រេចលុបចោលនូវការអនុញ្ញាតនេះក្នុងពេលណាក៏បាន។ សេចក្ដីសម្រេចនេះ គឺពុំមានការប៉ះពាល់ភាពស្របច្បាប់នៃការដំណើរការទិន្នន័យដែលបានប្រព្រឹត្តទៅពីមុនៗឡើយ។
• លោកអ្នកមានសិទ្ធិក្នុងការជំទាស់តវា រាល់ការប្រើប្រាស់ទិន្នន័យផ្ទាល់ខ្លួនរបស់លោកអ្នក ប្រសិនបើសង្កេតឃើញថាសកម្មភាពរបស់យើងខ្ញុំប្រព្រឹត្តទៅដោយបំពានលើផលប្រយោជន៍ម្ចាស់ទិន្នន័យ។ ក្នុងករណីនេះ យើងខ្ញុំនឹងបញ្ឈប់នូវការប្រើប្រាស់ទិន្នន័យផ្ទាល់ខ្លួនរបស់លោកអ្នក លុះត្រាណាមានកត្តាចាំបាច់ក្នុងការបន្ត។ លោកអ្នកក៏មានសិទ្ធស្នើសុំក្នុងការកែតម្រូវ លុប ឬកំហិតក្នុងការដំណើការព័ត៌មានផ្ទាល់ខ្លួនរបស់លោកអ្នក។

ការធានាបាននូវសុវត្ថិភាពនៃទិន្នន័យរបស់លោកអ្នក

• សេវាកម្មយើងខ្ញុំមានភ្ជាប់នូវប្រព័ន្ធសន្តិសុខដើម្បីការពារទិន្នន័យរបស់លោកអ្នកពីការចូលប្រើប្រាស់ដោយគ្មានការអនុញ្ញាត ការកែប្រែ ការលាតត្រដាង ឬការបំផ្លាញ។ ក្នុងដំណើរការបញ្ជូនទិន្នន័យ គឺត្រូវបានធ្វើកូដនីយកម្មដើម្បីរក្សាភាពជាឯកជននៃទិន្នន័យរបស់លោកអ្នក។ យើងខ្ញុំធ្វើការត្រួតពិនិត្យនូវរាល់ប្រតិបត្តិការនៃការប្រមូល រក្សាទុក និង ការប្រើប្រាស់ទិន្នន័យ ដោយរួមបញ្ជូលទាំងវិធានការសន្តិសុខរូបវន្តដើម្បីបង្ការនូវការចូលប្រើប្រាស់ប្រព័ន្ធដោយពុំមានការអនុញ្ញាត។
• យើងខ្ញុំអនុវត្តនូវវិធានការសន្តិសុខនៃការចូលប្រើប្រាស់ ក្នុងគោលបំណងរិតបន្ដឹងនូវការចូលប្រើប្រាស់ដោយបុគ្គលិកយើងខ្ញុំ ក្រុមហ៊ុន និងភាគីទីបីពាក់ព័ន្ធ ដែលមានតម្រូវការទៅលើទិន្នន័យទាំងនោះ។

ទំនាក់ទំនងមកខាងយើងខ្ញុំ

ការបន្តប្រើប្រាស់គេហទំព័ររបស់យើងខ្ញុំ នឹងត្រូវបានចាត់ទុកជាការទទួលស្គាល់ពីលោកអ្នកចំពោះរាល់ប្រតិបត្តិការរបស់យើងខ្ញុំដែលគោរពតាមគោលការណ៍ឯកជនភាព និងគោលការណ៍ទិន្នន័យផ្ទាល់ខ្លួន។ ប្រសិនបើលោកអ្នកមានចម្ងល់ទាក់ទងនឹងប្រតិបត្តិការលើទិន្នន័យ និងព័ត៌មានផ្ទាល់ខ្លួនរបស់អ្នកប្រើប្រាស់ សូមទាក់ទងមកកាន់ខាងយើងខ្ញុំ។